Kópavogsbær er nú með í kynningu á vinnslustigi, tillögu að nýju deiliskipulagi strandstígsins við suðurströnd Kársness.
Kársnesstígur á sunnanverðu Kársnesi. | Kópavogur
Miðvikudaginn 26. nóvember milli kl. 16:30 og 18:00 verður opið hús um tillöguna í safnaðarheimili Kópavogskirkju við Hábraut 1A.
Við fyrstu sýn virðist góð hugmynd að tvöfalda stíginn við strandlengjuna. En þegar betur er að gáð eru alvarlegir vankantar við þessa hugmynd:
- Það að bjóða uppá hraða og mikla hjólaumferð í mikilli nálægð við gangandi, skerðir bæði öryggi og náttúruupplifun.
- Meiri hraði á stígnum getur haft þau áhrif að gangandi upplifi sig óöruggari en áður
- Börn sýna ekki alltaf örugga hegðun og geta átt erfitt með að gera greinarmun á göngustíg og hjólastíg. Aukin hjólaumferð og aukinn hraði skerða frelsi og ógna öryggi barna á svæðinu.
- Hjólandi og gangandi deila áfram sama stígnum þó svo að lína aðgreini akgreinar. Rannsóknir sýna að málaðar línur skapa oft “falskt öryggi” enda hefur ekki verið sýnt fram á að málaðar línur dragi úr slysatíðni
Í skýrslu Umhverfissviðs Kópavogsbæjar kemur m.a. fram:
„Gert er ráð fyrir að með opnun Fossvogsbrúar verði Kársnesstígurinn einn umferðarþyngsti hjólastígur höfuðborgarsvæðisins”
„Búast má við að með tilkomu Fossvogsbrúar aukist hjólaumferð um stíginn það mikið að á álagstímum verði gangandi umferð í víkjandi stöðu”
Strandlengjan er skilgreind sem “grænt svæði” og útivistarsvæði skv. aðalskipulagi Kópavogs.
- Í skýrslu ReSource International sem var unnin fyrir Kópavogsbæ kemur fram að viðkvæm vistkerfi í fjörunni og nálægum svæðum geti raskast við þessa framkvæmd og aukin umferð vegfarenda geti haft neikvæð áhrif á náttúru og lífríki. Eftir því sem umferð eykst dregur úr þeirri kyrrð sem margir leita eftir í náttúrulegu umhverfi. Samhliða þessu eykst einnig hávaði og það getur haft áhrif á bæði upplifun fólks og hegðun dýra. Að auki getur lýsing áhrif á svæðið, spillt bæði upplifun gesta sem sækjast eftir nálægð við ósnortna náttúru, og jafnframt haft áhrif á dýralíf. Breikkun stígsins getur haft áhrif á ásýnd svæðisins og aukið manngert yfirbragð við strandlengjuna. Slíkar breytingar geta dregið úr upplifun af ósnortnu og náttúrulegu umhverfi.
- Er ásættanlegt að útivistargildi og náttúruupplifun við þessa perlu sem er friðuð á náttúruminjaskrá víki fyrir massívri hjólaumferð og rafknúnum og jafnvel vélknúnum smáfarartækjum?
- Lög um náttúruvernd eiga tryggja rétt almennings til að fara um strandlengjuna í þeim tilgangi að njóta náttúrunnar og stuðla þannig að almennri útivist í sátt við náttúruna, landsmönnum til heilsubótar og velsældar.
- Væri ekki nær að styrkja útivistargildi svæðisins þannig að fólk á öllum aldri með og án fötlunar geti notið náttúrunnar og nálægðar við sjóinn áhyggjulaust? Þannig að það sé möguleiki að ganga strandlengjuna afslappað með lítil börn án þess að halda fast í hendina á þeim? Þannig að börnin geti leikið sér á öruggan hátt á einu af fáum útivistarsvæðum hverfisins? Þannig að börnin okkar læri að upplifa og meta náttúruna sem er okkur næst? Þannig að fólk með hund í taumi geti slakað á?
- Væri ekki nær að beina þungum gegnumstraumi samgöngu- og keppnis hjólreiðamanna aðra leið á vel afmörkuðum hjólastíg meðfram umferðaræðum í skjóli frá veðri og vindum og á sama tíma byggja upp hjólastíganet innan Kársnessins með tengingu við skóla, sundlaug, vinnustaði og almenningssamgöngur?